2018 оны мал төллөх үеийн цаг агаарын нөхцлийн зөвлөмж

2018 оны мал төллөх үеийн цаг агаарын нөхцлийн зөвлөмж

Одоогийн байдлаар нийт нутгийн 70 орчим хувьд буюу Баруун-Урт, Эрдэнэцагаан, Дарьганга, Асгат, Мөнххаан, Онгон, Сүхбаатар, Уулбаян, Халзан сумдын ихэнх хэсгээр 11-28 см зузаан, 0,13-0,27 г/см3 нягтарч хатуурсан цастай байна. Цас, зудын байдлыг Засгийн Газрын 286 дугаар тогтоолын дагуу үнэлсэн дүнгээс үзэхэд нийт сумын 40 орчим хувь буюу 5 суманд цагаан зудтай,  30 орчим хувь буюу 4 суманд цагаанаар зудархуу, 30 орчим хувь буюу 4 суманд хэвийн байна. (www.sukhbaatar.tsag-agaar.gov.mn: 2018 оны 2 дугаар сарын сүүлчийн арав хоногийн цаг агаарын нөхцлийн тойм).

Зундаа гантай байсан, одоогоор цас, зудтай байгаа дээрх сумдын нутгаар өвс тэжээл дутагдах, мал турж эцэх, хээл хаях, жилбэ муутай төллөх, мал хорогдох зэргээр мал хаваржилтын байдал хүндрэлтэй байна.

3 дугаар сарын цаг агаарын урьдчилсан мэдээгээр агаарын дундаж температур ихэнх нутгаар 5-10 градус хүйтэн байх ба нутгийн баруун  өмнөд хэсгээр олон жилийн дунджаас 0.5-1.0 градусаар дулаан, бусад нутгаар дунджийн орчим байна. Энэ сард Эрдэнэцагаан орчмоор 5-7,3мм бусад нутгаар 0,4-5мм цас ордог бөгөөд нутгийн өмнөд хэсгээр олон жилийн дунджаас ахиу, бусад нутгаар дунджийн орчим хур тунадас орох төлөвтэй. Нэгдүгээр арав хоногийн эхэн болон эцсээр зарим газраар бага зэргийн цас, хоёрдугаар арав хоногийн эхээр нутгийн зүүн өмнөд хэсгээр, сүүлчээр нутгийн хойд хэсгээр цас, гуравдугаар арав хоногийн  дунд үеэр зарим газраар хур тунадас, уулархаг нутгаар нойтон цас орох төлөвтэй. Энэ үеүдэд ихэнх нутгаар салхи 12-14 м/с, хоёрдугаар арав хоногийн дунд болон сүүлч, гуравдугаар арав хоногийн дунд үеэр нутгийн өмнөд хэсгээр 16-18 м/с хүртэл ширүүсч цасан болон шороон шуурга шуурах төлөвтэй.

Цаг агаарын урьдчилсан мэдээгээр цаашид цас ихтэй нутгуудаар цас нэмж орох, зарим газраар жиндүү хүйтэн байх, үе үе хүчтэй цасан болон шороон шуурга шуурах төлөвтэй байгаа тул мал төллөлт, хариулга маллагаанд тааламжгүй байхыг анхаарч, цаг агаарын дунд болон богино хугацааны мэдээг тухай бүр авч ашиглаж байхыг зөвлөж байна.